ក្រៅពីសច្ចធម៌ហើយនោះ
សព្វសត្វនិងវត្ថុធាតុទាំងពួងសុទ្ធតែមានការផ្លាស់ប្តូរទៅ
គ្មានវត្ថុរឺសភាវៈណាស្ថិតស្ថេរគង់វង់នៅមួយកន្លែងជានិច្ចនិរន្តរ៍បានឡើយ។
ជីវិតមនុស្សយើងគ្រប់រូបនាមក៏ផ្លាស់ប្តូរទៅតាមកាលវេលា
អ្នកខ្លះក្នុងជីវិតមួយមានការផ្លាស់ប្តូរច្រើនដង អ្នកខ្លះក៏មានការផ្លាស់ប្តូរមិនប៉ុន្មានដង។
ការផ្លាស់ប្តូរម្តងៗក៏ធ្វើឲ្យមានការភ្ញាក់ផ្អើលផ្សេងៗគ្នា។
ចំណុចសំខាន់នៃការផ្លាស់ប្តូរមិនមែនស្ថិតនៅលើអ្វីផ្សេងឡើយ
តែវាស្ថិតនៅលើការសម្រេចចិត្តបែបឆាប់រហ័សរឺបន្ទាន់ភ្លាមៗនោះឯង ដូចលោក កូវឡេង
(អ្នកប្រាជ្ញតៃវ៉ាន់) ពោលថា “ការផ្លាស់ប្តូរគ្រាសំខាន់ក្នុងកំឡុងជីវិតមួយរបស់មនុស្សយើងតែងតែត្រូវបានសម្រេចចិត្តក្នុងកំឡុងពេលមួយពព្រិចភ្នែក”។
ក្នុងលោកនេះគ្មានអ្វីឡើយដែលស្ថិតនៅគង់វង់ជានិច្ចនិរន្តរ៍បាន
មានតែតថភាពដែលកើតឡើងតាមធម្មជាតិប៉ុណ្ណោះទើបអាចទ្រទ្រង់គង់នៅជាស្ថាពរបាន
សភាវៈផ្សេងៗសុទ្ធតែត្រូវរលាយសាបសួន្យទៅតាមកាលវេលា នេះជាច្បាប់របស់ធម្មជាតិ។
ជីវិតរបស់មនុស្សយើងកើតឡើងហើយរមែងមានថ្ងៃចាស់
ថ្ងៃឈឺ និង ថ្ងៃស្លាប់តាមសភាវៈអនិច្ចំនៃសង្ខារ
តែនេះជាការផ្លាស់ប្តូរតាមធម្មតារបស់ច្បាប់ធម្មជាតិ គ្មានអ្វីសំខាន់ណាស់ណាទេ។
ការផ្លាស់ប្តូរដែលចាត់ទុកថាជារឿងសំខាន់និងមានគុណតម្លៃចំពោះជីវិតយ៉ាងខ្លាំងនោះ
គឹការផ្លាស់ប្តូរដែលកើតឡើងក្នុងជីវិតប្រចាំថ្ងៃនេះឯង
ដែលជាការផ្លាស់ប្តូរកើតចេញពីចេតនានិងការតាំងចិត្តរបស់យើង
ចំណុចនេះហើយដែលយើងត្រូវនាំគ្នាគិតឲ្យបានល្អិតល្អន់បន្តិច។
មានតែទឹកនឹងប៉ុណ្ណោះ
ដែលនឹងត្រូវស្អុយរលួយ ទឹកដែលហូរវិលផ្លាស់ប្តូរទៅរហូតរមែងជាទឹកដែលស្អាតជាង។
ជីវិតដែលឈប់ស្ងៀម គ្មានការផ្លាស់ប្តូរ
រមែងជំពប់ជាប់នៅនឹងមួយកន្លែងគ្មានការអភិវឌ្ឍន៍។ ជីវិតដែលមានចលនារស់រវើក ចេះកែខៃ
ច្នៃប្រឌិត អភិវឌ្ឍផ្លាស់ប្តូរទៅរករបស់ដែលល្អជាងនោះឯង
ទើបជាជីវិតដែលមានភាពឈានមុខនិងរីកចម្រើនរុងរឿង។
តែជីវិតនេះនឹងអភិវឌ្ឍទៅមុខរឺធ្លាក់ថយក្រោយវិញ
វាស្ថិតនៅការសម្រេចចិត្តក្នុងការធ្វើការផ្លាស់ប្តូរ។
កាលបើយើងជឿជាក់ថាជីវិតត្រូវមានការផ្លាស់ប្តូរ
ព្រោះការផ្លាស់ប្តូរនាំរឿងដែលល្អមកកាន់ជីវិត យើងក៏គប្បីដឹងថា
យើងនឹងត្រូវផ្លាស់ប្តូរទៅកាន់ទិសដៅណាទើបវាល្អ។ សតិបញ្ញាទើបជាវត្ថុសំខាន់បំផុតសម្រាប់ធ្វើការផ្លាស់ប្តូរ។
សតិបញ្ញាដែលបានពោលមកនោះ បានដល់សតិបញ្ញាដែលមានទិន្នន័យមានហេតុផល
មានភាពល្អិតល្អន់សម្រាប់ធ្វើការផ្លាស់ប្តូរ។
ការសម្រេចចិត្តធ្វើរឿងអ្វីមួយក្នុងជីវិត
កុំប្រើគំនិតដែលកើតឡើងក្នុងមួយឆាវ
ព្រោះវាធ្វើឲ្យមនុស្សសម្រេចចិត្តខុសនាំជីវិតទៅកាន់គ្រោះថ្នាក់មកជាច្រើនហើយ។
យើងជ្រើសរើសទិញរបស់របរខោអាវផ្សេងៗនៅប្រើពេលរើសយ៉ាងយូរ
ទម្រាំការជ្រើសរើសផ្លូវដើរសម្រាប់ជីវិតទាំងមូល
នឹងប្រើគំនិតមួយឆាវមកសម្រេចចិត្តដូចម្តេចនឹងបានទៅ។ តែជីវិតក៏គឺជីវិត
ជួនកាលក៏មិនអាចយកជាការបាន ច្រើនដងណាស់ដែលពេលវេលាមួយពព្រិចភ្នែក ត្រូវបានយកមកប្រើក្នុងការសម្រចចិត្តផ្លាស់ប្តូរជីវិត
ទាំងនេះតើព្រោះហេតុអ្វីទៅ?
ស្ថានការណ៍
ស្ថានការណ៍ក្នុងពេលនោះ រឺហេតុការណ៍ចំពោះមុខដែលមានភាពសមរម្យ
ធ្វើឲ្យយើងប្រញាប់ធ្វើការសម្រេចចិត្ត។
ព្រោះហេតុនេះ
ជីវិតគួរមានការត្រៀមខ្លួនទុកជានិច្ច សម្រាប់ទទួលការផ្លាស់ប្តូរយ៉ាងឆាប់រហ័ស
ដើម្បីមិនឲ្យមានកំហុសឆ្កង រឺមានកំហុសឆ្កងតិចតួចបំផុត
ពីការសម្រេចចិត្តក្នុងគ្រានោះ។
នឹងសម្រេចចិត្តធ្វើរឿងអ្វីក្នុងជីវិត កុំធ្វេសប្រហេសហួសហេតុពេក
កុំអាស្រ័យភាពត្រូវចិត្ត ចូរអាស្រ័យភាពត្រឹមត្រូវតាមគន្លងធម៌ជាគោល។
No comments:
Post a Comment